Unioni de is Comunus de su Partiolla e de su Campidanu 'e Bàscius

Scola Segundària de Barrali

BARRALI: s’ULS aparìciat un’atòbiu tra is istudentis de sa scola segundària e su sonadori de launeddas Gian Orazio Orrù

Mèrculis, s'8 de màiu, su sonadori de launeddas de Donori, Gian Orazio Orrù e su responsàbili de s'ULS de Barrali ant atobiau is istudentis de sa I e II classi de sa scola segundària de primu gradu e is docentis Massimo Sanna de italianu e Anna Grazia Demurtas de mùsica.
Est istètia una letzioni-esibitzioni asuba de s'istrumentu musicali traditzionali prus connotu in su mundu, ma puru s'ocasioni po is piciocheddus de chistionai cun unu sonadori de launeddas chi tenit sceti 22 annus, est a nai chi no est de una generatzioni de òminis "antigus", chi funt atesu de su mundu intzoru e chi no ndi scint nudda de issus.
Seus partius de s'istòria e de su mestieri de su sonadori aici cumenti fiat a primu. Apustis is istudentis (e is docentis puru) ant pòtziu ascurtai sa mùsica de is launeddas sètzius in àula, in unu logu a ca no si custumant a biri is sonadoris, de calisisiat istrumentu, dal vivo e de acanta.

E chi, candu Oràtziu sonàt, no si moviat folla (foras de is peis chi fadiant su ritmu de is ballus asuta de su bancu), apustis is piciocheddus dd'ant fatu preguntas e ant bòfiu sciri totu de cumenti iat cumentzau a sonai e cumenti fadiat a pigai su sùlidu chentza de si firmai, e custu e cudd'àteru.
Cumenti at nau sa docenti de mùsica Anna Grazia Demurtas, no eus fatu sceti mùsica sarda, ma cultura musicali tout court.

1 | 2 | 3 | 4 | 5 | 6 | 7